عملية تكبير الصدر عند الدكتور اولكر مناف باشي اشهر طبيب تجميل

مرحبا أنا شفت الكل حاطين تجربتون مع الدكتور أولكر و غيرو من أطباء التجميل فحبيت شارككون تجربتي أنا كمان مشان الكل يستفيد منها خاصة أنو ما صرلي شهر عاملة  العملية..

أولاً و قبل كل شي انتبهوا من المترجمين يللي بيخبروكون عن حجوزات لفنادق و عمليات و بأسعار رخيصة كتيير و بيقلولكون الدكتور عامل عروض عالعمليات لأنو أكيد من وراها في مقلب. ممكن يكونوا واعدينكون بدكتور كبير و مشهور بدو يعمل العملية و ياخدوكون لعند دكتور تاني مبتدئ متلما عملوا معي .. للأسف هدول ولاد بلدنا وعم ينصبوا علينا .. المهم أنتو انتبهوا من هي النقطة .. بعدما أكلت المقلب أول مرة .. حجزلي جوزي موعد عند الدكتور اولكر و رحنا أنا وياه و نحنا عم ننتظر بالعيادة كانت معنا مساعدة الدكتور يللي بدها تترجملو شو بدي و لما شفنا الدكتور اولكر و هو مارئ من جنبنا اطلع فيني جوزي و قال لي بشماتة (شايفة شلون أنتو النسوان بينضحك عليكون هي جبتك لعند الدكتور أولكر بذات نفسو كانوا آخدينك لعند دكتور مو معروف من وين جاية) هون اضحكت علينا المساعدة لأنو تركنا المعاينة و بلشنا نتناقر.

المهم فتت على غرفة المعاينة أنا و المساعدة و الدكتور قلتلا أنا ناوية أعمل عملية تكبير صدر.. طبعاً كنت مستحية و الحمد لله أنو ما فات معي زوجي.. سألني الدكتور عن الحجم يللي بدي ياه و أنا اخترت من نماذج الأحجام يللي عند الدكتور. كان الحجم 385 على ما أذكر .. و أكدت عليه أنو ما يكون أكبر مشان يلائم جسمي لأنو طولي 167 و وزني 60 يعني إذا كان أكبر رح يبين أنو مانو طبيعي.. قللي لا تخافي نحنا ما منقبل نحط الحجم إلا يللي بيناسب جسمك و الحجم الأكبر بيعمل تقل للظهر و الرقبة اطمنت كتير و ارتحت للدكتور بصراحة، كلامو كان منطقي و ما في مبالغة حددنا موعد العملية تاني يوم. و أجى تاني يوم.

كانت عمليتي الصبح الساعة تمانة و نص ما كنت فطرانة طبعا و يا دوب شربانة شفة مي، سحبوا مني دم مشان التحليل و انتظرت فترة لبينما طلعوا نتائج التحليل، بهالأثناء اجى لعندي دكتور التخدير و سألني كم سؤال عن عمري و وزني و طولي و إذا معي أنا أو أمي أو أبي ضغط أو سكر. و إذا بدخن أو لاء .. بعدين دخل الدكتور أولكر و حدد المكان يللي رح يشتغلوا فيه بالعمليات و لما طلعوا نتائج تحليل الدم و عطوني البنج فوتوني عالعمليات قالتلي المترجمة يللي كانت معي: رح تطلعي بردانة من غرفة العمليات، هاد الشي طبيعي لا تتوتري من البرد هنن بيدفوكي و بيغطوكي ببطانية سمكية و دفاية كهربا، كانت هي أول عملية الي لهيك خليت مساعدة الدكتور تنزل معي لحد باب العمليات، و نحنا بالأصنصير بلشت عد متل المسلسلات و فكرت حالي رح نام قبل ما وصل للعشرة بس أنا قطعت الخمسين و ما كنت نام لوصلت لجوا و ما عاد حسيت بشي بعدين

وقت صحيت كنت بردانة فعلاً متلما قالتلي المترجمة و غطوني ببطانية سميكة شوي شوي بلشت صحصح، و لقيت جوزي جنبي و لما صحيت منيح سألتو إذا خبصت بالحكي وقت البنج قال: لا الحمد لله الله سترك.

تاني يوم طلعت من الغرفة و تخرجت من المشفى. رجعت لعند الدكتور بعد أسبوع مشان يشيك عالوضع قال كلو تمام، مع أنو كنت حاسة في قساوة بالصدر بس الدكتور قال هاد شي طبيعي و بيروح بعد كم يوم. كتبلي على مرهم مشان تروح الندبات مكان الجرح و أكد لي على مشد الصدر يللي لازم ضل لابستو شهر كامل.

و انا التزمت بكل كلامو و الحمد لله النتيجة مرضية  و بعد بكرة رح وقف لبس المشد و ارجع لحياتي الطبيعية

بنصح الكل قبل ما يعمل أي عملية أنو يطلع منيح و يدور عالنت و ما يسمع كلام أي حدا لأنو ما في أشطر من الحكي هالأيام..